azeri | pусский | english
ƏSAS SƏHİFƏ

     Avropa Olimpiya Oyunları Azərbaycan karatesinin inkişafına təkan verəcək

 

     Ölkəmizdə idman ildən-ilə inkişaf edir. Hər il idmançılarımız beynəlxalq turnirlərdə yüzlərlə medal qazanırlar. Dövlət rəhbərliyi xalqın, ilk növbədə, böyüməkdə olan nəslin fiziki-mənəvi sağlamlığının təmin olunması naminə idmanın inkişafını diqqət mərkəzində saxlamaqla yanaşı, ölkənin idman imicinin yüksəlməsinə çalışır.

     Azərbaycanda idmanın inkişafı istiqamətində dövlət tərəfindən həyata keçirilən siyasət bu sahədə böyük uğurların əldə edilməsi ilə nəticələnir. Dövlət başçısı İlham Əliyevin idman sahəsində həyata keçirdiyi siyasət Azərbaycanın idman ölkəsi kimi nüfuzunu xeyli artırmaqla yanaşı, beynəlxalq federasiyaların seçim edərkən məhz ölkəmizə üstünlük verməsini təmin edib. Azərbaycan müasir idman və digər infrastruktura, dünya arenalarında böyük uğurlar qazanan idmançılara sahib dövlət kimi seçim zamanı bir addım öndə olur.

     Bu, bir faktdır ki, hazırda Azərbaycan dünyanın idman mərkəzlərindən birinə çevrilib. Həqiqətən, Azərbaycan idmanı müstəqillik illərində böyük inkişaf yolu keçib, perspektivli yeniyetmə və gənc idmançıların aşkar edilməsi üçün ölkəmizdə əlverişli şərait yaradılıb.

     Bu gün respublikamızda idmanın digər növləri kimi, karate də inkişaf etməkdədir. Dünyada qədim ənənələri ilə seçilən karate hazırda Azərbaycanda da çox populyardır. Ölkəmizdə ənənəvi karate Milli Karate Federasiyasının (AMKF) yaradılmasından sonra (1994-cü il) sürətlə inkişaf etməyə başlayıb. 1997-ci ildən federasiya dünyada ən böyük karate təşkilatı sayılan, 180-dən çox ölkəni birləşdirən və 50 milyondan çox üzvü olan WKF-nin üzvüdür. Ötən müddət ərzində bu idman növü üzrə təmsilçilərimiz dünya arenalarında böyük nailiyyətlər əldə ediblər.

     Bu il Azərbaycan Karate Federasiyasının 20 ili tamam olur. Bu müddət ərzində Azərbaycan karatesinin nəyə qadir olduğunu və hazırkı vəziyyət ilə bağlı bəzi suallara aydınlıq gətirmək üçün Azərbaycan Milli Karate Federasiyasının birinci vitse-prezidenti, Qarabağ müharibəsinin iştirakçısı, ehtiyatda olan polkovnik- leytenant İlham QASIMZADƏ  ilə görüşüb söhbət etdik.

     Həmsöhbətimiz qeyd etdi ki, karate Azərbaycan idmanında daha çox nəticələr verən idman növlərindən biridir. Nəinki ölkəmizdə, hətta xarici dövlətlərdə favoritlərdən biri hesab olunur. Müxtəlif beynəlxalq yarışlarda karateçilərimizi çox ciddi rəqib kimi qarşılayırlar. Bu nəticələr dövlət başçısı, Milli Olimpiya Komitəsinin prezidenti cənab İlham Əliyevin Azərbaycan idmanına, o cümlədən karateyə diqqət və qayğısı sayəsində əldə edilib.

     Ötən ilin son aylarında Azərbaycan Beynəlxalq Bankı Milli Karate Federasiyasına rəsmi sponsor təyin ediləndən sonra bu sahədə köklü dəyişikliklər aparılıb, qısa müddətdə bir sıra irəliləyişlərə nail olunub. Bankın İdarə heyətinin sədri Cahangir Hacıyevin tövsiyəsi əsasında strateji inkişaf planı hazırlanıb və uğurla həyata keçirilir.

     Ümumiyyətlə, bu gün regionlarda istənilən bir idman növünün kütləvi şəkildə təbliğinə geniş yer ayrılmaqdadır. Bu proseslərdən  Karate Federasiyası heç də geri qalmır. Belə ki, kütləviliyi təmin etmək üçün tanınmış karateçilər reklam çarxlarının çəkilişlərinə cəlb edilir, regionlarda yarışlar təşkil olunur. Bu sahədə bir sıra planlar var: "Eyni zamanda, uşaq, yeniyetmə və gənclərin təhsil ocaqlarında təbliğat tədbirlərini təşkil etmək, karate video dərsləri, təlim broşürləri hazırlamaq və s. bu kimi kütləviliyə nail olma metodları fəaliyyətimizin bir hissəsidir. Son zamanlar karate bölmələrinin sayı artırılıb. Bakının müxtəlif ərazililərində, bölgələrin çoxunda karate məktəbləri var. Əhalinin nisbətən aztəminatlı təbəqəsi üçün müəyyən güzəştlər tətbiq edilib. Şəhid ailələrinin övladları respublikanın istənilən guşəsində karate ilə ödənişsiz  məşğul ola bilərlər. Azyaşlıları karate idmanına cəlb etmək üçün Şəkidə Azərbaycan Beynəlxalq Bankının Kuboku uğrunda ənənəvi beynəlxalq turnir keçirilir. Bununla yanaşı, bölgələrdə də turnirlər təşkil edilir ki, nəticədə bunlar uşaq və yeniyetmələrin karateyə axınına çox müsbət təsir göstərir. "Məktəbli ulduzlar" layihəsi çərçivəsində yüksək nəticə göstərməsə belə, fərqlənən idmançılara "Əzmkar döyüşçü" mükafatı təsis olundu.  Karate ilə məşğul olmaq üçün müraciət edənlərin çoxalması belə deməyə əsas verir. Federasiya rəhbərliyi tərəfindən regionlarda karatenin inkişafı ilə bağlı perspektiv tədbirlər planı hazırlanılıb. Şəki, Zaqatala, Balakən və Qusarda karateyə maraq artdığına görə o zonalarda işlər ilin əvvəlindən gücləndirilib. Mütəxəssislər digər bölgələrin imkanlarını da öyrənməklə təbliğat və konkret iş imkanlarını araşdırırlar. Təbii ki, məqsəd karatenin inkişafını paytaxtdan regionlara yönəltməkdir və çox keçməz ki, bu sahədə də istəyimizə nail olarıq".

     İlham Qasımzadə karateçilərimizin beynəlxalq miqyaslı yarışlarda çıxışı ilə bağlı da məlumat verdi. Bildirdi ki, bu gün karateçilərimiz beynəlxalq yarışlara çox böyük qürurla yollanırlar: "Tək ona görə yox ki, Azərbaycan karatesi dünya karate idmanının favoritlərindəndir. Həm də ona görə ki, milli komandanın üzvlərini demək olar ki, bütün ölkələrdə tanıyırlar, onlara böyük rəğbət göstərirlər. Hətta yarışlardan əvvəl püşkatma mərasimində karateçilərimiz digər komandalar üçün arzuolunmaz rəqibə çevrilirlər. Onu da qeyd edək ki, Dünya Karate Federasiyasının (WKF) prezidenti Antonio Espinos bu il aprelin son günlərində Finlandiyanın Tampere şəhərində Avropa Karate İttifaqının Konqresində çıxışı zamanı Azərbaycan karatesini, ölkəmizdə idmanın inkişafını, həmçinin ölkə başçısı cənab İlham Əliyevin idmana dövlət səviyyəsində qayğısını nümunə göstərdi. Avropanın 50-dək ölkəsindən nümayəndələrin iştirakı ilə konqresdə qürurverici hisslər keçirdik".

     Son bir il ərzində paytaxtımızda karate üzrə təşkil olunan beynəlxalq miqyaslı yarışlar ənənəvi hal almaqdadır. "Baku Open" və Azərbaycan Beynəlxalq Bankının Kuboku uğrunda uşaq və yeniyetmələr arasında turnir...

     Qarşıda isə Azərbaycanda tarixdə ilk dəfə olaraq təşkil olunacaq Birinci Avropa Olimpiya Oyunları gözləyir. Dünya idmanının tarixində ilk dəfə keçirilən Avropa Oyunlarına ev sahibliyi etmək missiyasının Bakının üzərinə qoyulması dövlətimiz üçün böyük önəm daşıyır. Gələn il təşkil olunacaq bu turnirdə medal gözlənilən idman növlərindən biri də heç şübhəsiz ki, karatedir.

     Federasiyanın birinci vitse-prezidenti bu yarışa çox ciddi hazırlaşdıqlarını vurğuladı. Qeyd etdi ki, ilk Avropa Olimpiya Oyunları Azərbaycan karatesinin inkişafına böyük təkan verəcək. Təbii ki, dövlət başçısının təşəbbüsü ilə karatenin yeganə qeyri-olimpiya döyüş idman növü kimi Avropa Oyunlarının proqramına daxil edilməsi də bu inkişafa hesablanıb. Prezident İlham Əliyevin Baku- 2015-də yüksək nailiyyət göstərmək kimi məsuliyyətli tapşırığını anlayır və son dərəcə ciddi hazırlıq planına müvafiq olaraq işləri həyata keçiririk. Baş sponsor Beynəlxalq Bank da qarşımıza bu şərəfli işin öhdəsindən lazımınca gəlmək tapşırığını qoyub. Avropa Oyunlarında karate yarışlarının favoritləri kimi bizim üzərimizə əlavə məsuliyyət düşür. Karate yarışlarının oyunların ilk günləri keçiriləcəyi isə bu məsuliyyəti dəfələrlə artırır. Düşünürəm ki, doğma divarlar bizə bu çətin və şərəfli vəzifənin öhdəsindən layiqincə gəlməyə kömək edəcək və Azərbaycan karateçiləri bu sınaqdan da üzüağ çıxacaqlar.

     İlham Qasımzadə  onu da bildirdi ki, cari il federasiyanın tarixində uğurlu ildir. Azərbaycan karateçiləri tarixdə ilk dəfə böyüklər arasında komanda kumite yarışlarında Avropa çempionu oldular. Federasiyada bəzi layihələr həyata keçirildi, yeniliklər edildi. "Şəfa" idman Sağlamlıq Kompleksində federasiyaya yeni ofis binası verildi. Milli komandaların hazırlıq səviyyəsini artırmaq üçün hər bir şəraitlə təchiz edilmiş iki böyük zallar idmançı və məşqçilərin ixtiyarına buraxıldı. Regionlardakı klublarımıza dəstək vermək üçün onlara tatamilər və digər lazımi məşq ləvazimatları göndərildi. Məqsədimiz müharibə şəraitində yaşayan xalqımıza sağlam idmançılar yetişdirmək, yüksək nəticələrimizlə Azərbaycanın idman ölkəsi imicini dəstəkləmək və dövlətimizin atributlarını beynəlxalq arenalarda fəxrlə nümayiş etdirməkdir.

     Sonda onu qeyd edək ki, fərəhli haldır ki, böyüklərdən ibarət milli komandamızın heyətində Rəfael Ağayev və Şahin Atamov kimi dünya ulduzları var. Eləcə də Niyazi Əliyev, Ayxan Mamayev, Rafiz Həsənov, Tural Ağalarzadə, Asiman Qurbanlı və digərləri kimi dünyada tanınmış idmançılarımızın davamçıları yetişir. Respublikanın əməkdar məşqçilərindən böyüklərin baş məşqçisi, Rəhman Hətəmovu, kata üzrə baş məşqçi Vahid Ayvazovu, gənclərin baş məşqçisi Şahin Xudaverdiyevi, Anar Allahverdiyevi xüsusi qeyd etmək istəyirəm.

     Bizim işimiz də elə ondan ibarətdir ki, bu inkişafı dayanmağa qoymayaq. Federasiyanın prezidenti Yaşar Bəşirov ötən 20 ildə bəzi çətinliklərə baxmayaraq təşkilatı bu günkü nəticələrə qədər yaşadıb inkişaf etdirib.

     Artıq federasiyada maliyyə şəffaflığı və sabitliyi təmin olunub. Eləcə də yeniyetmə, gənclər və böyüklərdən ibarət milli komandanın üzvlərinə aylıq təqaüdlər verilir. Beynəlxalq yarışlarda nəticə göstərən idmançılara və onların məşqçilərinə baş sponsor tərəfindən həvəsləndirici mükafatlar təqdim edilir. Bu yaxınlarda, tariximizdə ilk dəfə komanda yarışlarında Avropa çempionu olmuş millimizin kapitanı Şahin Atamova mənzil, digər idmançılara isə maddi mükafatlar verildi.

     İnanırıq ki, idmanın xüsusilə də karatenin inkişafına yaradılan şərait bu sahədəki uğurlarımızın sayını durmadan artıracaq və idmançılarımız yeni-yeni zirvələr fəth edəcəklər.

 

Elçin CƏFƏROV,

"Azərbaycan"

 

     Milli Məclisin orqanı olan "Azərbaycan" qəzetinin 17 sentyabr nəşrini PDF formatında buradan yükləyə bilərsiniz.

 

     Məqaləni orqanın rəsmi internet səhifəsindən oxuya bilərsiniz. 

SON XƏBƏRLƏR
22.10.2014
Milli komandanın heyəti açıqlanacaq
ətraflı oxu ...
22.10.2014
Milli hakimlərin dərəcələri artır
ətraflı oxu ...
20.10.2014
Yeniyetmə və gənclərin açıq Bakı birinciliyinə yekun vuruldu
ətraflı oxu ...
18.10.2014
Yeniyetmə və gənclərin açıq Bakı çempionatı - İlk günün nəticələri
ətraflı oxu ...
17.10.2014
AMKF prezidenti "İnter" PİK-in rəhbəri ilə görüşüb
ətraflı oxu ...
17.10.2014
"Feniks" klubu Qurban bayramı münasibətilə turnir keçirdi
ətraflı oxu ...
15.10.2014
Son nəticələri dəyərləndirən federasiya rəhbərliyi qarşıda duran məsələləri də müzakirə etdi
ətraflı oxu ...
Copyright © 2009 Milli Karate Federasiyası! Bütün hüquqlar qorunur. Sayt  Lider veb studiyası  tərəfindən hazırlanmışdır